Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 
Editouriau dóu mes de setèmbre

Quau se garrouio pèr l’escrituro de sa lengo…

En Alemagno, uno ourtougràfi nouvello crebara l’iòu à la rintrado, dins tout lou païs.
La reformo, meso en plaço lou 1é d’avoust 1998 se dèu aplica aquest an. E acò desseparo lou païs en dous. Lis escoulan roumand saran óublija d’escriéure segound li nouvèlli règlo ourtougrafico. L’ensèn de l’Istrucioun publico à demanda à tóuti li cantoun (l’equivalènt de nòsti despartamen) de faire tóuti parié.

 

Li puristo soun pas d’acord sus la pountuacioun o lou biais de coupa li mot en fin de ligno: es poussiblo quand lou mot de debuto de ligno es uno counsouno, es enebido quand la darriero silabo es uno vouielo (die Aue, lou prat). En alemand, i’a de mot emé sch, ck o kk. Avans se poudié coupa li dous k, aro, la règlo eisisto plus.
La séparacioun entre de mot emé un trat d’union (der Schulhof, la court de l'escolo) se poudié utilisa (der Schul-hoh), aro se pòu plus faire.
Lou tèms de transicioun (sèt annado) es acaba, d’aigo a passa au Rose, mai li lengo de serp se soun pas arrestado. D’amendamen fuguèron fa pèr establi li nouvèlli règlo. Pèr empura lou gavèu de journau couneigu an pres pousicioun pèr tourna mai à l’ourtougràfi noun refourmado (avès di classico?…)
Li mot d’óurigino fourestiero saran germanisa (spagetti), la majusculo rèsto pèr lou sustantiéu e li mot coumpausa rèston coume avans.
En avoust, soulamen lis escolo e l’amenistracioun publico saran legalamen tengudo d’aplica l’ourtougràfi refourmado. Coume à l’acoustumado, lis óupousant, espèron la cabussado de la reformo.
Vesès tambèn qu’eilabas, li reformo fan pas l’unanimita, mai seguisson pamens plan planet soun camin. Sènso rintra dins de detai trop coumplica, diren que degun anara pas en presoun nimai pagara pas de PV pèr de deco d’ourtougràfi.
Pamens, li Souïsse, reputa pèr soun calme e sa disciplino, dins lou cantoun de Berne, an refusa de rendre li règlo nouvello óubligatòri à l’escolo. En Alemagno, lis escoulan aprenon l’ourtougràfi anciano alor que la nouvello es ensignado despièi d’annado pèr li pichot Alemanique.
Dins la prèsso (Springer e Spiegel), li règlo soun un pau alambicado e es à la chausido dóu cap redatour. Es uno causo nourmalo dins la liberta individualo de chascun. Cresès?
E encò nautre, qu saup bèn coupa li mot en prouvençau? Coupaduro mistralenco o coupaduro nourmalisado?

Tricìo Dupuy

Zóu mai, la rintrado…

L’estiéu s’acabo, s’es ingimbra touto meno de festenau e d’espetacle mounte s’es fa clanti nosto lengo pèr ramenta i gènt dóu païs que soun parla èro toujour gaiard, e moustra, d’un meme cop, i touristo, mai noumbrous, que lou lengage istouri de Prouvènço es pas lou franchimand.
L’evenimen de l’estiéu en Prouvènço es esta pamens l’anóuncio óuficialo que, fin-finalo, lou proujèt “Iter” sus la fusioun nucleàri se farié bèn à Cadaracho. Tóuti lis elegit se lipon li brego e duerbon grand li bras à la mano de Cadaracho.
Avèn adeja agu lou miraiet de Fos e sa danacioun, mai èro pas tant dangeirous, s’en vai en douliho e descargo de bourdiho.
Aro, avèn Cadaracho, que proumet tout plen d’emplé, tout plen de terro à vèndre, tout plen de tausso proufessiounalo à recampa e tout plen d’escoubiho nucleàri à se garda… Basto, n’en parlaren mai.
Adounc l’autouno es aqui, fini de canta. Fau, aro, ensigna nosto lengo dins lis escolo… Fau, tourna-mai, ramenta i couleitiveta loucalo sa toco d’apara la lengo dou païs.
Es pas de dire, mai quand vesèn que lou Counsèu Generau de l’Audo publico uno revisto bilengo titrado « Aude en Oc », quand sabèn que lou Counsèu Regiounau de Lengadò-Roussihoun fai uno counsulto, li 3 e 4 de setèmbre, di militant pèr la desfènso de la lengo, se demandan se penequejan pas trop en Prouvènço.
Quant au Gouvèr parisen, pèr l’article 2 de sa Coustitucioun emé pèr la ratificacioun e meso en pratico de la Charto éuroupenco di lengo regiounalo, poudrian recoumença de lou sagagna.
Lou dissate 22 d’óutobre à Carcassouno sara belèu un bon biais.

Bernat Giély

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat