Editouriau
dóu mes de nouvèmbre
Estat Generau
Lis Estat generau de la demoucracìo territourialo soun en plaço, d'assetoun au Senat.
Acò pèr prepara un proujèt de lèi sus la descentralisacioun.
Dóu cop, li bràvi senatour parton li proumié escouta lou pople di regioun, despartamen, coumunauta urbano, coumuno, etc.
Dóu cop, pecaire, podon plus se preóucupa de la proupousicioun de lèi tendènt à la recouneissènço di lengo e di culturo regiounalo, presentado aquest an pèr lou senatour Roubert Navarro. L'apoundoun à l'article 2 de la Coustitucioun “dins lou respèt di lengo e di culturo regiounalo qu'apartènon au patrimòni de la Franço…” tóuti se n'en garçon.
Pamens sian mai parti pèr prene l'èr de la descentralisacioun.
Lou presidènt de la Republico, Francés Hollande, l'es venu dire lou mes passa à nòsti valènt senatour.
Es simple, pèr ié baia fisanço, vai crea l'Aut Counsèu di Territòri, pèr la councertacioun, l'evaluacioun e la negouciacioun emé l'Estat.
Aqui, quand s'envèn dire qu'es legitime d'encadra aquelo evoulucioun trouban pamens un apoundoun que nous pertoco: “ — Avèn tambèn besoun mai de teni comte de la diversita de nòsti territòri. Parle pas aqui simplamen de l'Outro-Mar que counèis adeja aquelo evoulucioun, parle de nòsti regioun… Avèn besoun tambèn, de teni comte de la diversita de nòsti regioun”. Saupre se la diversita lenguistico
sara dins sa banasto?
Aro, pèr coumença vòu supremi li normo, uno pèr dos, es-à-dire tóuti li reglamen vouta pèr rèn dins li regioun. Faudra pèr decida d'uno nouvello normo l'avis favourable d'uno Coumessioun d'Evaluacioun.
La clarta de tout acò fa pas lume, belèu que vòu miés garda lou tèste en versioun óuriginalo pèr coumprene: “l'objectif, c'est d'identifier clairement la collectivité responsable d'une politique de façon à faire en sorte que toute autre collectivité qui en aurait l'envie, ne puisse intervenir que dans le cadre qui aura été fixé par l'autorité qui en a eu compétence”.
Bon, ço que i'a de coumprene es que gardaren noste milo-fueio de couleitivita territourialo, es un regale… pèr li countribuable que se partejon, éli, rèn que lou pagamen dis impost loucau.
La nouvèuta, que n'es pas uno, lou presidènt prepauso de crea un estatut de metroupòli qu'anara en delai dis establimen pubic atuau e poudra eiserça l'ensèn di respounsableta dóu desvouloupamen urban.
Es deja la garrouio à Marsiho pèr acò…
|
