Editouriau dóu mes de jun Toujour la memo musico Souto lou chale d’un tratat Lou mes de mai èro pas encaro acaba quouro manderian lou journau à l’estampaire, adounc sabian pas se lou tratat pèr uno Coustitucioun éuroupenco èro esta aprouva pèr li voutant de l’Estat francés.

De tout biais chanjara pas grand causo à l’acioun que devèn mena, au quoutidian, eici e aro, pèr revendica lou dre d’espandi nosto lengo e de la manteni dins noste païs.
Basto, dóu bon usage di tratat, li Prouvençau n’en podon parla au verai. Acò es d’ate que prenon toujour un bon biais. Lou tratat que ligavo la Prouvènço à la Franço coume un principau à-n-un autre principau en gardant sis us, si coustumo e sa lengo èro di mai counsequènt, remirable, mage, foundamentau, essenciau, pèr s’uni au Reiaume, mai, aro, vau ni coco ni moco.
Pamens, se fau desdire de rèn, i’a de tratat de galoubet e tambourin que gardon soun chale meloudious.

La casso au bretoun dins l’Essouno

Li Bretoun an besoun de bèn se teni, e de bèn se teisa… Sufis pas que lou Counsèu Regiounau aguèsse recouneigu óuficialamamen, au coustat de la lengo franceso, l’eisistènci dóu bretoun e dóu gallò coume lengo de Bretagno pèr qu’acò siegue autourisa dins la Republico franceso. Es un senatour dóu despartamen de l’Essouno que s’interrogo, coume dis, sus la counfourmita d’aquelo prouclamacioun emé li dispousicioun coustituciounalo que dispauson que “la langue de la République est le français”.
Aquéu Moussurot, denouma Jan-Lu Melenchon, denóuncio, fai lou rapourtaire e demando de counèisse quénti mesuro lou Menistre de l’Interiour entènd prene emé li representant de l’Estat dins la Regioun Bretagno pèr empacha qu’aquéli proujèt noun coumproumeteguèsson l’egalita di ciéutadan…
Lou bretoun es pas un gibié que vanego en Essouno, sai-que, dequé ié pren de tira, à-n-aquéu bougre.
“L’unioun dins la diversita”, “li pople restant fièr de soun identita”, de-segur acò es escri dins la Coustitucioun pèr l’Éuropo, pas pèr la Franço… se pòu encaro sagata quàuqui minourita dins l’Eisagone, Moussu Melenchon.

Bernat Giély

Paraulo de Catalan

Lis Catalan dóu CAOC venguèron passa Pasco en Auvergno e segne Garriga i Trullols n'aproufichè pèr larga un discours que se poudèn pas empacha de vous n'en baia lou meiour.
"Iéu que siéu Catalan e que parle toujour lou catalan, emplegue aro la lengo óucitano pèr diferènti resoun. La premiero perqué m'agrado. La segoundo perqué es la lengo la mai procho de la miéuno, la catalano. La tresenco perqué l'UNESCO a classifica la lengo óucitano en dangié serious de s'amoussa e li Catalan voulèn ajuda à sauva nosto lengo bessouno". Ah, se n'i'avié mai pèr pensa parié!… E coume manco pas d'umour apoundeguè dos resoun de mai: "La quatrenco rason perqué lou Presidènt de la Republico franceso diguè au Canada que fau recounèisse la lengo inuit que senoun despareissirié uno partido dóu patrimòni de l'Umanita. La cinquenco resoun perqué lou menistre francés de l'Educacioun, Francés Fillon, pèr l'inaguracioun dóu Saloun Expolangues, diguè qu'èro "attaché à la diversité linguistique"… E d'apoundre, segne Garriga: "La demoucracìo es pas la ditaturo de la majourita. La demoucracìo vòu dire de respeta li minourita e li nacioun sens estat propre e acò es liuen de la realita moundialo."
E se nòsti baile escoutavon mai lis estrangié?…

P.B.