Editouriau
dóu mes de Janvié
Li róumi de noste camin roumiéu
L’identita di lengo regiounalo de Franço
L'an
2009 restara l'annado de la mai grando manifestacioun pèr la defènso
de nosto lengo, mai de que n'en rèsto ?
Lou Coumitat Anen Oc es fisançous, li milierat de jouine qu'èron
aqui soun aro lèst pèr prene en cargo l'aveni de nosto
lengo.
Pièi, emai siguèsse pas esta perfèto, la cuberto
mediatico s'es de-bon alargado.
—
Coustatan que nosto vesibilita càmbio… avèn prougressa
en dinamico, en serious, dins la qualita de l'image que remandan… Nosto
legitimeta s'es renfourtido. Nòsti revendicacioun soun justo e
demoron pacifico mai, mai que jamai determinado.
Saupre, aro, se de se tourna trouba tóuti li dous an pèr
uno caminado pèr carriero nous menara luen ?
Poudèn mai se grata l'embourigo en afourtissènt que despièi
2005, li tres manifestacioun an fach avança li causo, es pas uno
messorgo.
Mai,
fau faire la repasso de noste darnié passo-carriero dins
Carcassouno. La reüssido èro assegurado. Li lengo regiounalo
venien d'intra coustituciounalamen dins lou patrimòni de la Franço.
La Menistro de la Culturo, Crestino Albanel, afourtissié à-z-auto
e forto voues, dins lou round de l'Assemblado Naciounalo, la necessita
d'un cadre legislatiéu dounant uno formo istituciounalo au patrimòni
lenguisti de la nacioun e coumpourtant de mesuro councrèto dins
li relarg de l'ensignamen, di media, di service public, de la signalisacioun
e de la toupounimìo, em' acò rapourtavo qu'un proujèt
de lèi sarié presenta en 2009 au Parlamen. La vitòri
en marchant pacificamen èro soulido.
E brin e bran! la Menistro s'esbignè… Soun ramplaçant,
lou nebout de soun ouncle, entènd ni dia ni viravòu, uno
lèi sus li lengo regiounalo es inutilo.
Manifestacioun que manifestacioun, ausis pas rèn.
Tout ço que pertoco pas sa culturo moundano, l'impourtuno, lou
besuquet…
Avisas-vous que pèr soulamen ié demanda lou perqué de
soun refus a faugu espera uno questioun escricho de la deputa de Giroundo,
Martino Faure.
Lou Majestuous Menistre de la Culturo fourça de respondre davans
l'Assemblado naciounalo prenguè pas la peno de se desplaça.
Toujour tant despichous, faguè legi sa rebifado pèr soun
coulègo lou Menistre de l'inmigracioun, de l'integracioun, de
l'identita naciounalo e dóu desvouloupamen soulidàri. Coume
acò, lou debat limita, la mostro en man, à sièis
minuto èro clava d'avanço.
La letanìo coumencè pèr faire saupre que l'Estat
prenié plenamen si respounsablilita, counsacro, coume lou sabès,
de mejan impourtant à l'ensignamen di lengo regiounalo, que s'agiguèsse
dóu noumbre de poste d'ensignaire, de la fourmacioun di mèstre,
di doutacioun ouràri vo encaro de la realisacioun de suport pedagougic
e editouriau. Chasque jour, plusiour centeno de prougramo soun difusa
sus lou territòri francés dins uno deseno de lengo regiounalo,
noutamen outro-mar…
Lou mounde es bèu! E de dire que se pòu ana mai luen pèr
afierma la presènci di lengo regiounalo dins l'espàci public.
La counvicioun dóu menistre de la culturo e de la coumunicacioun
es que l'encastre legislatiéu atuau laisso d'impourtant marge
de manobro, que soun toujour pas esplecha.
Que sian couioun, l'avian pas vist
La lougico de l'ome cultiva es aqui : — Es perqué lou Gouvèr
s'interrogo sus la pertinènci d'uno intervencioun legislativo
suplementàri tant que tóuti li poussibleta eisistanto
saran pas estado esplourado e aplicado.
Eh! bèn! O! es pas de manifestacioun, es d'esplouracioun que nous
falié faire, quènti tòti sian!
Adounc lou menistre manquè pas de ribla lou clavèu : — Fau
evita li dous estèu que sarien, d'uno part, lou fa d'encoumbra
nòsti travai pèr uno lèi puramen desclarativo
e redoundanto, e, d'autro part, aquéu d'abouti à-n-un
tèste
qu'en durbènt un dre pousitiéu en favour di loucutour
particulié se
tuertarié au principe coustituciounau d'indivisibleta de la
Republico e d'egalita davans la lèi.
Es bèn segur de favouritisme de se preoucupa di loucutour particulié que
sian… e lou sabian pas, paure de nou! Gramaci moussu lou menistre
de nous pas leissa durbi un dre pousitiéu que nous sarié nefaste.
Un cop, aquéli risco bèn mesura, lou menistre degno pamens
dire qu'acò empacho pas de faire avança lou doursié en
partenariat emé li couleitiveta loucalo… en clar: vai-t'en
caga à la vigno.
Coume se diguè à la bravo deputa de Girondo que vouguè respondre
au noum dóu group d'estùdi : — Je suis désolée,
ma chère collègue, mais nous avons largement dépassé,
en l'occurrence, le temps imparti à chaque question, qui est,
je le rappelle de six minutes pour chaque question .
Acò nous lèvo noste arroungantisme, que !
Sièis ouro de manifestacioun s'esvalisson en sièis minuto
de pauraulis ministeriau.
Basto! n'avèn vist d'autro… Dounaren encaro un cop de coulas.
Adounc
lou Coumitat Anen Oc a decida d’intensifica si relacioun
emé lis àutri lengo de Franço dins la draio de la
plato-formo que fuguè signado, lou 20 de mai de 2009, pèr
li federacioun encargado di lengo basco, bretouno, corso, catalano, alsaciano
e creolo, que porto pèr toco de davera uno vertadiero poulitico
lenguistico, eficaço pèr assegura l’espandimen d’aquéli
lengo regiounalo.
D’aqui entre aqui, saran prepausado d’acioun coumuno, belèu
pas de masso, mai emé uno pourtado simboulico e mediatico forto.
Pièi aro que lou Gouvèr respeito pas si proumesso, la moubilisacioun
s’endevèn que mai d’atualita.
Se fau lèu lèu ana plagne à nòstis elegit
d’aquelo vergougno e ié demanda, coume se dis aro, d’interpela
lou gouvernamen.
Fau rena tambèn emé de letro, de courriéu vo de
coumunicat de prèsso.
Poudèn pas espera lou roumavage biennau de nòsti manifestacioun
pacifico arresta pèr lou cop que vèn à la primo
de 2012, senoun nòsti menistre nous van santifica d’èstre
de tant brave roumiéu. Counvencioun
lengo regiounalo/Reitourat
Luen
de Paris, dins la Regioun Lengadò-Roussihoun acò boulego
pèr la lengo. Lou roussit (???) que se fai senti dins l’encountrado
pèr lis eleicioun regiounalo que vènon empacho pas de faire
bono obro.
Uno counvencioun de partenariat pèr lou desvouloupamen de l’ensignamen
de la lengo d’oc e de la lengo catalano es estado signado lou 14
de desèmbre passa entre la Regioun Lengadò-Roussihoun e
lou Reitourat de l’Acadèmi de Mount-Pelié.
Lou CREO Lengadò qu’es un pau lou mèstre d’obro
d’aquel acord se regaudis. La voulounta dóu Reitourat es
aro publicamen afourtido de valourisa l’ensignamen e la couneissènço
de la lengo e de la culturo d’oc, de-coutrìo emé la
Regioun Lengadò-Roussihoun pèr proumourre aquéu
patrimòni vivènt, aro, recouneigu pèr la Coustitucioun
de la Republico.
De-segur à l’ouro ounte lou menistre de la Culturo e de
la Coumunicacioun se descargo sus li couleitiveta territourialo pèr
assegura la subre-vido di lengo regiounalo, aquelo counvencioun es à l’avans-gardo
dóu prougrès.
Belèu que poudra servi d’eisèmple à moustra
i candidat pèr lis eleicioun regiounalo que se preparon.
En Prouvènço mancaren pas de demanda acò à nòsti
candidat à la presidènci de la Regioun "Prouvènço-Aup-Costo
d’Azur" soun avejaire. |
