Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de desèmbre

Parlamen éuroupen ...
Lou sauvamen de nosto lengo passara belèu  pèr l’Éuropo…

Lou 22 de nouvèmbre passa au Parlamen Éuroupen d’Estrasbourg, l’intergroupe sus li lengo regiounalo tenié uno sesiho counsacrado à l’óucitan dins l’estiganço de sa recouneissènço óuficalo e de soun sauvamen.
Pèr aquelo escasènço, la deputado au Parlamen Éuroupen, Catarino Grèze, counvidè uno bello chourmo de gènt vengu de tout lou Païs d’oc, pertouca pèr l’aparamen de sa lengo. Catarino Grèze es forço ativo dins l’intergroupe "Minourita naciounalo, coumunauta naciounalo e lengo". Aquéu groupamen de deputat, presida pèr Francés Alfonsi, que s’acampo chasque mes, s’encargo de tóuti li questioun de lengo regiounalo e di minourita naciounalo en Éuropo.
Bèu proumié, fan counèisse li proublèmo qu’eisiston coume aqui l’urgènci de sauva la lengo d’oc en Franço e prepauson de soulucioun. Pèr acò faire, prenon l’avejaire dóu mounde dins soun endré, e recampon tambèn li maje representant d’aquel afaire pèr counèisse soun biais de vèire. Es pèr acò que lis Óucitan soun mounta à-n-Estrabourg presta ajudo à l’intergroupe.
La delegacioun prouvençalo fuguè reçaupudo, la vèio, pèr lou presidènt Francés Alfonsi, emé sa chourmo de counseié qu’an uno couneissènço forço aprefoundido dins lou doumaine di lengo regiounalo e de la reglamentacioun éuroupenco que se pòu que mai adouba.
Li membre de la delegacioun, menado pèr Pèire Costa, aguèron de presenta lis acioun que menavon en Prouvènço, lou journau "Prouvènço d’aro" fuguè pas óublida.
Francés Alfonsi espliquè, pièi, soun role, soun acioun e li proublèmo que se rescontron pèr l’aparamen di lengo regiounalo.
D’en proumié, fau saupre que i’a quàsi pas ges de prougramo de finançamen pèr li lengo regiounalo.
Empacho pas de trouba de soulucioun e de faire avans, coume en s’esquihant dins lou “ Prougramo culturo ” vo lou "Prougramo pèr l’educacioun".
Segur encaro, que demié li lengo d’Éuropo, i’a uno fausso egalita, 23 lengo soun óuficalo e 3 soun de lengo de travai dis istitucioun éuroupenco emé la priourita à l’anglés.
Vènon, pièi, à mita escoundudo, li lengo regiounalo d’Éuropo, un pau à bóudre.
L’apelacioun "lengo regiounalo" es trop simplisto. Fau destria aro li vertadiéri lengo regiounalo. Lou russe qu’es lengo regiounalo dins lis Estat de soun anciano Unioun, es pas menaça de desparèisse e a pas besoun d’ajudo.
La lengo d’oc, au contre, es uno lengo menaçado de mort dins un Estat assassin.
Vaqui perqué l’intergroupe parlementàri vòu faire prene counsciènci que l’esperfors se dèu pourta sus li lengo regiounalo menaçado.
Fuguè tambèn l’escasènço de moustra uno carto geougrafico di païs membre que recounèisson dos vo tres lengo óuficialo sus soun terraire pèr s’avisa que la Franço es dins lou pichot groupe qu’impauson qu’uno souleto lengo.

Lou lendeman fuguè la recepcioun óuficalo au Parlamen éuroupen, dins l’emicicle de l’intergroupe "Minourita naciounalo, coumunauta naciounalo e lengo".
Catarino Grèze aculiguè la delegacioun avans la sesiho e presentè l’obro que se fai e se vai pousqué faire au nivèu de l’Éuropo pèr nosto culturo, uno di plus grando d’Éuropo.
Li deputat prenguèron plaço, emé, à la tribuno, lou presidènt F. Alfonsi, lou souto-presidènt C. Tabadji, la deputado C. Grèze, e pèr parla de nosto lengo, G. Latrubesse, lou counseié regiounau de Miejour-Pirenèu, lou baile dóu CIRDOC, F. Hamel e lou presidènt federau di "Calandreta", J-L. Blénet.
Lou presidènt Francés Alfonsi durbiguè la sesiho pèr mai dire que i’a de lengo regiounalo que soun presènto dins un autre Estat e i’a de lengo coume l’óucitan que soun abandounado e menaçado de desparèisse. D’aqui l’urgènci de pourta soustèn à nosto lengo, ço que se prepauso de faire l’intergroupe.
Lou counseié regiounau, G. Latrubesse manquè pas, éu, de parla de nosto longo lucho pèr sauva la lengo e de ramenta que lou Felibrige es la proumiero asouciacioun creado en Éuropo pèr apara uno lengo regiounalo…
Pèr baia tambèn uno vesioun de l’acioun menado en païs d’oc, F. Hamel presentè lis ativeta dóu CIRDOC de Beziés, lou grand cèntre de couóuperacioun interregiounalo que recampo  tóuti li libre despièi li tresor di troubadour e mai li vièi doucumen escri que provon que la sourtido dóu latin en Éuropo se faguè d’en proumié pèr l’óucitan, la dimensioun éuroupenco d’aquéu patrimòni d’oc es aqui…
J-L. Blénet, lou presidènt de la federacioun di Calandreta venguè pièi presenta l’estat de l’ensignamen de la lengo dins li Calandreta.
55 escolo e 2 coulège ensignon la lengo à 3.300 escoulan. Acò emé 200 ensignaire e tambèn aperaqui 200 emplegat. Es de-bon l’assouciacioun la mai ativo pèr l’aparamen de la lengo  que miso sus l’aveni en toucant li jouine.
Malurousamen, l’ajudo de l’Estat francés es pas grando, ço que sèmblo parié pèr tóuti lis escouleto regiounalo coume li Diwan, e J-L. Blénet de counclure aqui : Nous avons un même mot pour dire malheur avec les Bretons : "France".
Lou souto-presidènt de l’intergroupe parlementàri, "Minourita naciounalo, coumunauta naciounalo e lengo", lou deputa C. Tabadji fuguè pas en rèsto en coumençant pèr dire "La franço es la vergnougno de l’Éuropo" de leissa mouri l’óucitan. Es un d’aquéli païs qu’emé un drech inmourau óupremis li lengo regiounalo…
Dins tout s’es tambèn parla de la Charto éuroupenco di lengo regiounalo, qu’impauso despièi 1993 lou respèt dóu dre di minourita i nouvèu païs qu’intron dans l’Unioun éuroupenco, mai, pecaire, pertoco pas lis Estat adeja membre coume la Franço. Ansin l’Unioun éuroupenco pòu pas èstre vertadieramen coumpetènto en matèri de prouteicioun dóu dre di minourita, soun role dins lou doumaine de la diversita lenguistico es pas de ramplaça l’acioun dis Estat, mai de la sousteni e de la coumpleta. Acò pauso un proublèmo pèr nous-autre, estènt que la Franço recounèis ges de minourita sus soun terraire e si lengo regiounalo an pas ges d’estatut.
L’óucitan pamens qu’es la cinquenco lengo coustituciounalo de l’Espagno se pòu emplega pèr escriéure au Parlamen éuroupen que fara responso dins aquelo lengo, mai i’a rèn que pèr lis estajan d’aquéu païs que lou podon faire. Lis Auvergnat, Lengadoucian o Prouvençau lou podon pas, aquelo lengo es pas óuficialo en Franço, morto coustituciounalamen emé l’epitàfi de l’article 2.
Basto !  l’intergroupe parlementàri, "Minourita naciounalo, coumunauta naciounalo e lengo" a de pan sus la cledo, mai soun, de-bon, counsciènt que la lengo d’oc, la proumiero lengo literàri de l’Éuropo mouderno es en dangié e se moubilison d’à founs pèr soun aparamen.
Pèr acaba la sesiho, tout lou mounde s’aubourè pèr canta l’inne naciounau dóu païs, "Aquéli mountagno", entouna pèr Gibert Mercadier, lou presidènt dóu Coungrès permanènt de la lengo óucitano, que manquè pas de rapela qu’aquelo cansoun fai s’abeissa li mountagno coume de frountiero e que se n’en poudrié faire tambèn l’inne de l’Éuropo.

Bernat Giély

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat