Editouriau
dóu mes de Desèmbre
Un acamp
pèr sauva la lengo
Lou
8 de nouvèmbre à z-Ais, li Prouvençau
se soun recampa à z-Ais, à la Biblioutèco Mejano,
lou dissate 8 de nouvèmbre, esperant veni trouba aqui d’acioun
remirablo pèr la sauvo-gardo de la lengo nostro.
La
salo Armand Lunel èro clafido d'un moudne
coumpausite, de Prouvençau de la bono, d'Óucitan dóu
gros grum, de papet curious, de dono silenciouso, de graficaire engaja,
de partisan de quaucarèn, de defensour d’autro causo, de
curious souspichous…. tóuti forço atenciouna à ço
que s'anavo dire.
Sus lou pountin, lou pessu dis inteleituau saberu dóu païs, èron
envirouna pèr uno pichoto pougnado d’ome pouliti de partit
divers, mai d’acord pèr sauva li lengo regiounalo.
Adounc lou platèu èro bèu. À coustat d’Ervé Guerrera
de Region Provence, Counseié municipau de la Coumuno de z-Ais,
que menavo li debat, se sarravon Felipe Martel que representavo la FELCO,
Miquèu Benedetto lou Felibrige, Pèire Brechet pèr
lou CREO-Prouvènço, Girome Guirand (ensignaire), Magali
Gazzano de l'emissioun Vaqui, de FR3, Gustave Alirol, presidènt
de Peuple solidaire, Crestian Kert (deputa UMP), Andriéu Guinde
(deputa PS), carga de missioun au Counsèu Generau pèr la
culturo prouvençalo e, Miquèu Vaxès, (deputa PC).
Cadun à soun tour faguè uno introuducioun au debat.
L’apoundoun à la fin de la Coustitucioun que fai saupre
que li lengo regiounalo fan partido dóu patrimòni countentavo
li besoun de quàuquis un… Emai n’i’aguèsse
un pèr ausa dire que que plaça nosto lengo dins lou patrimòni èro
adeja la relega dins li relicle dóu passat… Soulet l’article
2 rèsto au presènt !
Mai fau pas se faire de marrit sang, auren un proujèt de lèi
bèn-lèu…
À
despart d’acò, li militant poudien que dire e redire ço
que se dis toujour sus lou sujèt de la defènso de la lengo. Èro
subre-tout li pouliticaire qu’èron espera sus lou pountin… |
Gustave Alirol, elegi d’Auvergno, presidènt
dóu Partit Óucitan presentè un projèt pouliti
pèr la lengo, valènt à dire la meso en plaço
d'uno lèi. Pènso que fau passa pèr li regioun pèr
sauva li lengo regiounalo e rediguè que l'ensignamen de la lengo
es pas plus carivènd que d'ensigna lou francés. Noste proublèmo
quand coumparo emé li Basque, li Bretoun, li Catalan, li Corse
o lis Alsacian, es que nautre ié cresèn pas, cresèn
pas à l’aveni de nosto lengo…Es aqui que lou bast
nous maco !
Andriéu Guinde, que parlo la lengo, forço estaca à sa
culturo prouvençalo, nous faguè lou bilans dóu travai
coumpli pèr lou Counsèu Generau en favour de la lengo: un
article dins li 2 grafìo dins la revisto Accents, la nouminacioun
d'un carga de missioun. La signalisacioun sara meso en prouvençau,
dins lis entrepreso privado e publico, dins la prèsso…
87 assouciacioun an demanda uno suvencioun au Counsèu Generau. Faudrié ensigna
la lengo i group foulklouri qu'es pas nourmau que dansèsson mai
parlèsson pas la lengo (13 assouciacioun foulklourico dins li Bouco-dóu-Rose).
Lou Counsèu Generau baiè d'argènt i countaire, à la
Fiesta des Suds à 3 couralo. De mai, fau ajuda lou cant en prouvençau
dins li coulège!
Acabè emé : - le programme du Conseil Général,
comme vous le voyez, est très ambitieux ! (sic)
Sai-que sarian sauva se tout lou mounde se met à canta !
Miquèu Vaxès, éu vòu faire marca la lengo au
patrimòni l'umanita. Faudrié un debat à l'Assemblado
naciounalo emé nosto participacioun, emé la FELCO, mai sara
dificile. Souleto, uno acioun naciounalo permetrié de sauva li lengo
regiounalo.
Pènso que fau ensigna la lengo aqui ounte i'a de demando, valènt-à-dire
que lou corse se pòu ensigna à Marsiho, lou prouvençau
e l'auvergnat à Paris…
Crestian
Kert s'estimè urous que la lengo siguèsse dins la
Coustitucioun, mai sara dificile de demanda mai pèr aro. L'ensignamen
di lengo fourestiero à l'escolo es uno councurrènci di grando
pèr l'ensignamen dóu prouvençau.
Es is elegi d’ajuda lou menistre pèr faire lou tèste
de lèi, mai quete sara lou menistèri que prendra en cargo
li lengo regionalo: la culturo o l'ensignamen? Grando questioun !
Dins tout, nous faguè un pau vergougno en ramentant que la literaturo
prouvençalo d'aro es mai feblo que la literaturo di lengo bretouno
o alsaciano.
Acabè en disènt que se la lengo es mau couneigudo, es nosto
fauto, se nosto missioun es incouneigudo, es nosto fauto, n’en fasènt
pas proun…
Fidèl aparaire de la lengo, vai buta mai à la rodo en demandant
is assouciacioun de l'ajuda escriéure la lèi, mai de rapela
que pèr escriéure la lèi, d'en proumié fau èstre
tóutis ensèn, coutrìo… uni !
Presidènt de Coumessioun à l’Assemblado Naciounalo,
proche dóu Gouvèr, sara de-segur un porto-voues de trìo
pèr sauva nosto lengo… Mai,
la sesiho èro, d’en proumié, un debat public,
alor venguè lou tèms dis intervencioun dóu mounde
: un pouèto dóu Luberoun, un cabiscòu de Crau, un
escrivan de la Mar, un barjacaire de l’incouneigu, un militant senestrisant,
un repepiaire d’à passa tèms, un Crist en sceno pèr
la multiplicacioun di lengo, un proufèto vesiounàri d’un
Mistral encaro demié nautre, devengu óucitanisto de la bono,
un puristo que voulié pas entèndre parla francés e
uno estrangiero demandavo de parla prouvençau mai emé uno
reviraduro ensemblamen escricho sus un escran…
Cadun se gratavo l'embouligo en parlant de soun avejaire persounau sus
soun cas à-n-éu, segur de teni la verita vertadiero… roun-roun
e rangoulun gentilet, milanto cop ausi dins aquéli meno d’acamp… E
pèr anima lou debat , lou pico-bounet, countristaire de service,
vengu rèn que pèr rena, urous coume un papo de pourta la
contro-dicho dins uno assemblado dourmihouso…
Vaqui, degun es vengu prepausa uno acioun nouvello pèr apara nosto
lengo, faudra espera la manifestacioun bi-annualo pèr se desendourmi.
Plus degun esperavo, la salo se vuejavo pau à cha pau.
Falié bèn barra sesiho emé li counclusioun, fasié niue
!
Se faguè coumprene que la desunioun d'ùni prouvençau,
escanavo definitivamen nosto lengo.
E pièi, avèn uno visto trop chauvino de la lengo. La diversita
di lengo apartèn à tóuti.
La Coustitucioun acetara jamai li lengo regiounalo dins la vido civilo,
es adeja un grand pas que ié fuguèsson marcado.
Felipe
Martel aguè lou mot de santo Claro. Lou minouritàri
dèu èstre mai malin que lis autre. Fau basti l'oustau e pas
se garrouia pèr la coulour de la tapisserié. Se fau parla
entre nautre.
Adounc, la souleto acioun retengudo, es la manifestacioun dóu 24
d'óutobre 2009, à Carcassouno, e rèn mai.
E d'eici en lai, passara d'aigo au Rose.
Un
rescontre que fuguè pamens proufichous pèr li vertadiés
aparaire de la lengo que se retrobon toujour coutrìo e se counforton
dins sa lucho… |